ആരോ പ്രമുഖനായ ഒരു വ്യക്തി പറഞ്ഞു കേട്ട കഥയാണ്.
നേവിയുടെ ഒരു പാരച്യൂട്ട് ട്രെയിനിംഗ് ക്യാമ്പ് നടക്കുന്നു. വലിയ ഉദ്യോഗസ്ഥരും കുട്ടികളും കൂടി ഒരു വിമാനത്തില്‍ കേറി മുകളിലേക്ക് പറക്കുകയാണ്. മുതിര്‍ന്ന ഒരു ഉദ്യോഗസ്ഥന്‍റെ വക മുട്ടന്‍ പ്രസംഗങ്ങള്‍ നടക്കുന്നുണ്ട്. കുട്ടികള്‍ക്ക് നന്നായി ബോറടിക്കുന്നുണ്ട്. എന്നാല്‍ പട്ടാള ക്യാമ്പിന്‍റെ എല്ലാ ടെന്‍ഷനും എല്ലാവരുടെയും മുഖങ്ങളില്‍ ഉണ്ട്. ആദ്യമായി പാരച്യൂട്ടില്‍ കേറുന്നതിന്റെടെന്‍ഷന്‍ വേറെയും
സീനിയര്‍ ഉദ്യോഗസ്ഥന്‍ എല്ലാവരോടുമായി പറഞ്ഞു.
"നിങ്ങളുടെ കരിയറിലെ നാഴികക്കല്ലായേക്കാവുന്ന പാരച്യൂട്ട് ട്രെയിനിങ്ങാണ് നടക്കാന്‍ പോകുന്നത്. നമ്മള്‍ ഇപ്പോള്‍ ഏകദേശം 5000 അടി ഉയരത്തില്‍ ആണുള്ളത്. ഓരോരുത്തരായി വിമാനത്തിന്‍റെ സൈഡിലെ വാതിലിനടുത്തെക്ക് വരണം. സൈഡില്‍ തൂക്കിയിട്ടിട്ടുള്ള ബാഗ് വയറിനു പുറത്ത് ധരിക്കണം. പാരച്യൂട്ടാണ് അതിനുള്ളില്‍. പിന്നെ വാതിലില്‍ നിന്നും താഴേക്ക് ചാടണം.
ഏകദേശം 1000 അടി താഴെ എത്തുമ്പോള്‍ വയറില്‍ ധരിച്ചിട്ടുള്ള ബാഗിന്‍റെ മധ്യഭാഗത്തുള്ള മഞ്ഞ ബട്ടന്‍ അമര്‍ത്തണം. അപ്പോള്‍ നിങ്ങളുടെ ബാഗിന്‍റെ സിബ് തുറക്കും.
വീണ്ടും 1000 അടി കൂടി ചെല്ലുമ്പോള്‍ പച്ച ബട്ടന്‍ അമര്‍ത്തണം. അപ്പോള്‍ ബാഗില്‍ നിന്നും പാരച്യൂട്ട് പുറത്ത് വരും.
വീണ്ടും 1000 അടി കൂടി ചെന്നാല്‍ ചുവന്ന ബട്ടന്‍ അമര്‍ത്തണം. അപ്പോള്‍ പാരച്യൂട്ട് നിവരും. പിന്നെ സുരക്ഷിതരായി താഴെ ഗ്രൌണ്ടില്‍ ഇറങ്ങണം.
പിന്നെ അവിടെ പാര്‍ക്ക് ചെയ്തിട്ടുള്ള ജീപ്പില്‍ കയറി ക്യാമ്പില്‍ തിരിച്ചെത്തണം.
എങ്കില്‍ ശരി. ഓരോരുത്തരായി ചാടിക്കോളൂ...
ആദ്യത്തെ ഊഴം കിട്ടിയവന്‍ ചങ്കില്‍ പിടപ്പോടെ താഴേക്ക് നോക്കി. പിന്നെ ഗുരു കാരണവന്‍ മാരെയും ദൈവങ്ങളെയും മനസ്സില്‍ ധ്യാനിച്ച് താഴേക്ക് ചാടി.
1000 അടി ചെന്നപ്പോള്‍ മഞ്ഞ ബട്ടന്‍ അമര്ത്തി. ഒന്നും സംഭവിച്ചില്ല.
സാരമില്ല, സിബ് തുറക്കാനല്ലേ.. പച്ച അമര്‍ത്തുമ്പോള്‍ തുറക്കുമായിരിക്കും.
1000 അടി കൂടി ചെന്നപ്പോള്‍ പച്ച ബട്ടന്‍ അമര്ത്തി. ഒന്നും സംഭവിച്ചില്ല.
1000 അടി കൂടി ചെന്നപ്പോള്‍ ചുവന്ന ബട്ടനും അമര്ത്തി. പ്രതീക്ഷിച്ച പോലെ തന്നെ ഒന്നും സംഭവിച്ചില്ല.
ഇത്രയൊക്കെ യായപ്പോഴേക്കും ശരവേഗത്തില്‍ താഴേക്ക് പോരുന്നതിനിടെ കക്ഷി ചിന്തിച്ചു.
ഇക്കണക്കിനു ഗ്രൌണ്ടില്‍ ചെല്ലുമ്പോള്‍ അവിടെ ജീപ്പും കാണുകേലായിരിക്കും!
1 comments:
super bai
Post a Comment