എന്‍റെ ഒരു കൂട്ടുകാരന് ഉണ്ടായിരുന്നു. നല്ല ഗ്യാരണ്ടി കളറും തല്ലു കൊള്ളും എന്ന ഗ്യാരണ്ടി നാക്കുമുള്ള ഒരുത്തന്‍! അഹങ്കാരമാണെങ്കില്‍അല്പവും കുറവില്ല. പക്ഷെ അതിന്‍റെ ഒരഹങ്കാരവുമില്ല
സാധാരണ ക്ലാസ് കഴിഞ്ഞു വരുമ്പോള്‍ ബസ് സ്റ്റാണ്ടില്‍ ഞങ്ങള്‍ക്ക് പോകാനുള്ള ബസ് കിടപ്പുണ്ടാകും. പക്ഷെ കേറാന്‍ പറ്റില്ല. എസ് ടി പിള്ളേര്‍ക്ക് അവസാനമേ കേറാന്‍ പറ്റൂ. ബസ് ജീവനക്കാരുടെ ഈ കരിനിയമം ഏതാണ്ട് എല്ലാ വിദ്യാര്‍ഥി നേതാക്കളും അംഗീകരിച്ചിരുന്നത്കൊണ്ട് ഞങ്ങള്‍ക്ക് നിസ്സഹായരായി പുറത്ത് നില്‍ക്കേണ്ടി വന്നിരുന്നു.
പക്ഷെ ബസ് വിട്ടിട്ടും ആളുകള്‍ കുറവാണെങ്കില്‍ സീറ്റില്‍ ഇരിക്കാന്‍ അനുവാദം ഉണ്ടായിരുന്നു. അത് കൊണ്ട് ബസ് വിടുന്ന സമയത്ത് ബസില്‍ കേറാന്‍ പിള്ളേരുടെ വലിയ തിരക്കായിരുന്നു.
ഒരിക്കല്‍ ഈ കൂട്ടുകാരന് ബസ് വിട്ട സമയത്ത് ബസില്‍ അസാമാന്യ യുദ്ധം നടത്തി കയറി ഒരു സീറ്റ് പിടിച്ചു. നിര്‍ഭാഗ്യ വശാല്‍ അത് ഒരു വികലാംഗ സംവരണ സീറ്റായിരുന്നു. അടുത്ത സ്റ്റോപ്പില്‍ നിന്ന് തന്നെ ഒരു വികലാംഗന് കയറുകയും ചെയ്തു. എഴുനെല്‍ക്കെന്ടതായി വന്ന ഇദ്ദേഹം കടുത്ത അമര്‍ഷത്തോടെ സൈഡില്‍ നില്‍പ്പായി. സീറ്റ് കിട്ടിയ വികലാംഗനാകട്ടെ വിജയശ്രീലാളിതനായി ഞെളിഞ്ഞിരുന്നു ഇവനെ നോക്കി ഒന്ന് ചിരിക്കുകയും ചെയ്തു.
സാധാരണ കൈയോടെ പ്രതികരിക്കാറുള്ള കൂട്ടുകാരന് ഒന്നും മിണ്ടിയില്ല.
കുറച്ചു സ്റ്റോപ്പുകള്‍ കഴിഞ്ഞു. വികലാംഗന്റെ സൈഡില്‍ ഇരുന്ന യാത്രക്കാരന്‍ ഇറങ്ങി. കൂട്ടുകാരന് വികലാംഗന്റെ അടുത്തായി സീറ്റ് കിട്ടി. വിന്‍ഡോ സൈഡില്‍ വികലാംഗന്, അടുത്ത് കൂട്ടുകാരന്.
അടുത്ത സ്റ്റോപ് എത്തി. പെട്ടെന്നു അപ്രതീക്ഷിതമായി കൂട്ടുകാരന് വികലാംഗന്റെ മുന്‍പിലൂടെ കൈ പുറത്തേക്കിട്ടു കൈ വീശി പറഞ്ഞു. "ഹായ്"
വികലാംഗന് ഒന്ന് ഞെട്ടി. പിന്നെ ആരോടാണ് ഇവന്‍ ഹായ് പറയുന്നതെന്നറിയാന്‍ പുറത്തേക്ക് വെട്ടിത്തിരിഞ്ഞ് നോക്കി. ആരെയും കാണുന്നില്ല. ഇളിഭ്യനായി ഇവനെ തിരിഞ്ഞു നോക്കിയപ്പോള്‍ ഒന്നും സംഭവിക്കാത്തതു പോലെ ഇവന്‍ ഇരിപ്പുണ്ട്. മുഖത്ത് ഒരു ചെറിയ ചിരി.
അടുത്ത സ്റ്റോപ് എത്തി. പിന്നെയും ഇവന്‍ വികലാംഗന്റെ മുന്‍പിലൂടെ കൈ പുറത്തേക്കിട്ടു കൈ വീശി പറഞ്ഞു. "ഹായ്"
വീണ്ടും വികലാംഗന് വെട്ടിത്തിരിഞ്ഞ് നോക്കി. ആരെയും കാണുന്നില്ല.
അതാ അടുത്ത സ്റ്റോപ്പില്‍ പിന്നെയും. ഇത്തവണ വികലാംഗന് ബലം പിടിച്ചിരുന്നു. എങ്കിലും ആകാംക്ഷ അടക്കാനാകാതെ തിരിഞ്ഞു നോക്കി. ആരുമില്ല.
വീണ്ടും പല സ്റ്റോപ്പുകളില്‍ ഇത് ആവര്‍ത്തിച്ചു.
അവസാനം വികലാംഗന് ഇറങ്ങേണ്ട സ്റ്റോപ്പ് ആയി.
രണ്ടും കല്‍പ്പിച്ചു കക്ഷി കൂട്ടുകാരനോടു ചോദിച്ചു.
താനാരെയാ കൈ വീശി കാണിക്കുന്നത്?
ആരെയുമില്ല! എനിക്ക് ഇങ്ങനെ ഒരു സ്വഭാവമുള്ളതാ.. ആട്ടെ, ചേട്ടനെന്തിനാ തിരിഞ്ഞു നോക്കിയത്?
വികലാംഗന് ഒന്നും മിണ്ടാതെ ഇറങ്ങിപ്പോയി!
0 comments:
Post a Comment